xiu baru du pati dante
un suba, ma baru ya yau to la bazar. da loga to xiu baru: "no yam yo kandi o keke a dura de mi a bazar." xiu baru ya loga: "ya, ya, mama! mi san da. mi un dai baru. cing to vai!" ma baru ya loga "sal" i da to vai.
xiu baru es unike. da fikir: "mi zai bil fa eni xe, ki mi vol!"
xiu baru ya move to vaxi kamar. da fikir "mi no vol vaxi mi su dante a zai." xiu baru es dus.
xiu baru ya tire un xiu kar a pan un kamar. da vide la keke sanduku a meza. da fikir "mi vol yam keke!" a da memo: "a! mama haram mi yam keke." xiu baru no yam keke.
xiu baru ya vide la kandi botel a almari. da fikir "mi vol yam kandi!" a da memo: "a! mama haram mi yam kandi." xiu baru no yam kandi.
xiu baru vide la medu pote a alo almari. da fikir: "mama loga siro xe tema de medu. mi bil yam medu!" xiu baru ya side a kursi i da yam xiu medu. medu ya bon guste!
xiu baru ya yam pan medu.
pos, xiu baru ya sense un sense, ki da no san, a boke. da su dante pate!
da kape la tele fon gi. da loga: "salam! sual tu es dante dava ja? cing lai to mi! mi ha un pate dante!"
la dava ja ya lai to baru famili su dom. da loga: "sual tu yau mede?" xiu baru loga: "ya! mi ha pate dante!"
la dava ja ya cing la xiu baru ya side a kursi i kai se su boke. "aha! un dante es poli dus! mi mus kape da to ekse"
la dava ja ya juxa yo dava xe to dante nama a karibu de dus dante. xiu baru no sente la pate de zai.
la dava ja ya tire la dante va pinse gi. a la dante no lai!
vaf ya lai mede la dava ja. la dava ja i vaf ya tire la dante, a la dante no lai!
mau ya lai mede la dava ja i vaf. la dava ja i vaf i mau ya tire la dante, a la dante no lai!
ekore ya lai mede la dava ja i vaf i mau. la dava ja i vaf i mau i ekore ya tire la dante...
la dante lai to vai!
la dava ja ya loga to xiu baru: "la dus dante zai a vai. cing memo uze un dante broxa a pan un suba i a pan un xam!" xiu baru ya vode memo.
xiu baru loga: "xukra, dava ja i vaf i mau i ekore!"
xiu baru ya vaxi da su dante va un dante broxa a pan un suba i xam.
ma baru ya note la xiu baru fa mas bon di hafiza se su dante. mama loga: "tu es bon xiu baru!"