un suba baru mama vol go do bazar. ta loga do baru ban: "no yem kandi i kek na dur de me na bazar." baru ban loga: "ya, ya, mama! me sabi ta. me baru dai. cing go wai!" baru mama loga "salam" i ta go wai.

baru ban na sol. ta pensa: "nun me kan kar eni xe de me vol!"

baru ban do kamar wax. ta pensa "me no vol wax dante nun." baru ban se bad.

baru ban se joga gar lit na mei kamar. ta vide sanduk kek na meza. ta pensa "me vol yem kek!" ama ta kap memo: "ai! mama se koman me no yem kek." baru ban se no yem kek.

baru ban se vide kandi botol na almari. ta pensa "me vol yem kandi!" ama ta kap memo: "ai! mama se koman me no yem kandi." baru ban se no yem kandi.

baru ban se vide medu bin na alter almari. ta pensa "mama se loga nul ting bi tema medu. me kan yem medu!" baru ban se sit na kursi i ta yem lit medu. medu se gusta bon!

baru ban se yem tot medu.

bada, baru ban se senti no sabi ge ting na boka. ta ha dante tung!

ta kap tele fon. ta loga: "halo! kia ni e doktor dante? cing lai do me! me ha dante tung!"

doktor se lai do jia de famil baru. ta loga: "kia ni neses mede?" baru ban se loga: "ya! me ha dante tung!"

doktor cing baru ban se sit na kursi i kai boka. "aha! un dante cok bad! me mus kap ta do wai."

doktor se juxa dawa do nama dante na jin de dante bad. baru ban se no senti tung ze nun.

doktor se tira dante bi pinse. ama dante no lai!

waf se lai mede doktor. doktor i waf se tira dante, ama dante no lai!

mau se lai mede doktor i waf. doktor i waf i mau se tira dante, ama dante no lai!

lixu se lai mede doktor i waf i mau. doktor i waf i mau i lixu se tira dante...

dante se lai do wai!

doktor se loga do baru ban: "bad dante na wai nun. cing memo yung brox dante na mei suba i na mei xam!" baru ban se wada memo.

baru ban se loga: "danke doktor i waf i mau i lixu!"

baru ban se wax dante bi brox dante mei suba i mei xam.

baru mama se nota baru ban se kura dante max bon. mama loga: "ni e baru bon!"