un suba baru' mama wol enda to bazar. ye loga to baru' bace: "no nyama kande i keke na dura du mi na bazar." baru' bace loga: "si, si, mama! mi jan ye. mi day baru'. cing enda way!" baru' mama loga "salam" i ye enda way.

baru' bace na sol. ye fikra: "zay mi ken kar eni xey du mi wol!"

baru' bace enda to wax kamer. ye fikra "mi no wol waxa dante zay." baru' bace si mal.

baru' bace joga lil gar na mey kamer. ye wida keke sanduke na meza. ye fikra "mi wol nyama keke!" a ye memora: "ah! mama loga mi no nyama keke." baru' bace no nyama keke.

baru' bace wida kande botol na almari. ye fikra "mi wol nyama kande!" a ye memora: "ah! mama loga mi no nyama kande." baru' bace no nyama kande.

baru' bace wida medu pote na alter almari. ye fikra "mama loga nul xey du tema medu. mi ken nyama medu!" baru' bace sidu na kursi i ye nyama lil medu. medu bon gusta!

baru' bace nyama pan medu.

bada, baru' bace senta no jan da sente na boka. ye da dante tung!

ye kapa tele fon. ye loga: "halo! kia tu si dante dokter? cing lay to mi! mi ada tung dante!"

dokter lay to baru' famil da dom. ye loga: "kia tu nida helpe?" baru' bace loga: "si! mi ada tung dante!"

dokter cing baru' bace sidu na kursi i kaya boka. "aha! un dante day mal! mi bixu kapa ye to way."

dokter juxa dawa to dante manse na jin du mal dante. baru' bace no senta tung ze zay.

dokter tira dante na pinse. a dante no lay!

waf lay helpa dokter. dokter i waf tira dante, a dante no lay!

maw lay helpa dokter i waf. dokter i waf i maw tira dante, a dante no lay!

lixu lay helpa dokter i waf i maw. dokter i waf i maw i lixu tira dante...

dante lay to way!

dokter loga to baru' bace: "mal dante na way zay. cing memora uza dante brox na mey suba i na mey xam!" baru' bace wada memora.

baru' bace loga: "danke dokter i waf i maw i lixu!"

baru' bace waxa dante na dante brox mey suba i mey xam.

baru' mama nota baru' bace kura se da dante max bon. mama loga: "tu si bon lil baru'!"