tri shau goro
"Three Little Pigs" a Pandunia baxa. be kitaba de thethedorn.
🐷🐷🐷
a tele pas, mama goro ten tri shau goro. ama da no ten bas yam to don to damen. un den a damen e bas lau, da miti damen to dunia, to damen soka semen su gol a jiu.
un me goro no suka gung. da pul no vol gung i bina se su dom de gan gazo. du me goro ya shau mas di suka gung, i da bina se su dom de moka kane. pos vo, damen chante i danse i van a pan un dia.
tri me goro ya teza gung a pan dia, i da bina se su dom de petra. da e bala dom, ki ten tanur i duman tubo. da rupa ka da bil bala di lipa a la masim bala hava.
a pos den, volfe move a karibu dau, a ki la tri goro ya dom. da vide gan gazo di dom, i da aroma la goro in la dom. da fikir la goro e bon yam, i da su boke ya kai sana yo sui.
🐺
la volfe ya darba la mun i loga: "shau goro! shau goro! ching kai la mun! ching kai la mun!" ama la shau goro ya vide la volfe su dai hande a la chavi kong. da javabu: "no! no! no!" pos, la volfe fa shou se su dante i loga: "mi hava i mi hava i mi parcha tu su dom!"
da hava i da hava i da parcha la dom! la volfe fa kai se su boke to masim, ki da bil, ama un me goro ya ga, to dom de du me shau goro.
la volfe zoku a shau dau. da pas du me dom, ki be sana va moka kane. da vide la dom. da aroma la goro a in. da su boke ya kai sana yo sui, a sabu de da fikir damen e bon yam.
da darba la mun, i loga: "shau goro! shau goro! ching kai la mun! ching kai la mun!" ama la shau goro vide la volfe su gona ore a la chavi kong. damen javabu: "no! no! no!" la volfe shou se su dante i loga: "mi hava i mi hava i mi parcha tu su dom!"
🌬️
da hava i da hava i da parcha la dom! volfe teste kape la du goro a sam zaman, ama da vol mas ka bas, i da kape siro goro! da su dai boke be klus to siro she de air. la du shau goro ya ga, masim rapide ka damen su fute bil kino damen.
la volfe teste kape damen a shau dau. da karibu kape damen, ama damen lai to petra dom i kelele kai la mun i a chen de la volfe ya bil kape damen.
la tri shau goro ya fobi. damen san la volfe ya vol yam damen. damen e poli poli fobi. la volfe no le yam a pan den, i da su yam vol be kai no toler bil. da zai bil aroma la pan tri goro a dom. da san la tri shau goro e bon yam she.
la volfe fa darba la mun, i loga: "shau goro! shau goro! ching kai la mun! ching kai la mun!" ama shau goro vide la volfe su shau huang yen a chavi kong. damen loga: "no! no! no!" la volfe shou se su dante i loga: "mi hava i mi hava i mi parcha tumen su dom!"
da hava i da hava. da hava i da hava. i da hava, i da hava, i da hava, ama da no bil parcha vo dom. a fin, da poli fatige di hava. sun da no bil mas hava. da ting to shush, i da shau fikir.
vo e mas ka bas. la volfe marcha a gola a furi. da plan da lai pas la duman tubo i da yam shau goro to sham yam. ama a dur de da eskale to dom su chati, la shau goro ya sana un poli garma di hogo i loka un dai sui ketel a hogo. a pos, a sam zaman de la volfe lai to dipe de tanur, la shau goro fa kai la ketel... ayo! volfe be padu to in de poli garma di sui!
🔥
la shau goro fa loka un daka a la ketel. la volfe be boli a ketel! i la tri shau goro ya yam da to sham yam.